「裝修約章」是什麼東東？ 最近有電視台報導一間爛尾公司，相關公司曾於20/21年度獲得零投訴認證。於是，有些花生友就話啦： 「拿！所謂認證呀！咪即係CAP水囉！」 「邊個批認證？咁點樣認證批認證那個？」 「信那個都傻既。」 版主相信，花生友既智慧其實係非常之高。佢地只係大智若愚，用不太嚴謹的文字去表達出裝修戶主的鬱結。 因為的而且確，市面上好多獎項基本上都係買番黎，拎既同頒既都冇責任可言。咁問題就黎啦，呢D獎項同認證，究竟有冇存在價值？但點解消委會仲提議政府搞認證呢？ 那個做調查報導既節目，似乎無意深究呢個題材。咁就等我地用呢個post掃一掃盲。 (1) 認證的本質和期限 A. - 裝修約章是一個費用全免既可下載資源，協助廣大戶主在裝修開始之前，釐清與裝修公司就行規/期望上的落差。冇錯呢份野只係版主某年坐起廁所度打出黎既六頁紙，絕對唔講得上係咩權威。但就幫到好多戶主掃除不必要的爭議。很多行家亦都讚好，因為有左呢份約章，同客既溝通變得容易和有系統。 B. - 至於個認證同嘉許，就係俾D公司sign up呢個約章系統，將佢地既承諾曝光在陽光下，只要佢用呢個承諾黎宣傳，佢就有左一份約束。全年冇俾人投訴就獲得年尾嘉許，有投訴就被unlist。當然相關公司仍可「用舊證去宣傳」，但消費者亦要留意，任何認證包括政府頒發的，本質上都必然有期限。 C. - 如果一間公司跟你說，我地「20/21年度錄得零單工業意外獲得嘉許」，你會不會怪責工業意外系統不可靠呢？你會話「關個系統咩事？係間公司變左質！」好合理。 D. - 我又真係多口向掌管業界資料庫既壞帳追收公司查詢呢間「盛X」公司，佢答「呢個慣性債仔黎」。我再問佢幾時開始出事，佢話大約係2022年年尾。間公司發生左咩事冇人知，但也側面解釋了為什麼間公司2020/21年後就不再進行呢個曝光承諾既遊戲。 (2) 黑白名單的迷思 E. - 有些人會不明白，一間白公司又點會無端端變黑？一間黑公司既前身，只會係一間「未爆鑊既黑公司」，不會係一間白公司！情況就好似一個渣男，未偷食之前只係一個未犯案既渣男，之後亦只會一世係渣。 F. - 其實版主初初入行都整過黑白名單，之所以轉為支持「配對系統」，係因為「黑白名單」其實係一個思維誤區。你搵樓下既水電師傅做全爆，佢就會白變黑，你搵間其實淨係識做油漆既裝修公司做油漆，佢亦會由黑變白，仲會做得好好添。 G. - 呢個亦都係點解，咁多人爛尾都係「朋友介紹」甚至「親友裝修」──你要朋友或親友介紹那間「咁啱得咁橋」就係最匹配你需求那間公司，你話你要幾好運先得？咁當然，呢個業界亦有「絕對渣」既公司，睇下段。 (3) 壞份子的手法 H. - 高級的騙子，係識做工程的。佢地會在建立一定口碑後，好似靖之設計咁，一野捲走幾十單工程數以百萬計既首期走佬。所以面對市面上好多「防爛尾保證」，消費者係應該諗下，如果真係保證到，點解消委會唔直接建議政府提供保證？保證左會變成點？ I. - 老實講，任何行業、簽約方都有權選擇單方面違約離場，甚至從行業退場的。「防爛尾保證」就和「防租霸保證」、「防離婚保證」、「防違約保證」一樣，你不能就咁按字面咁去理解，也要用常識去衡量其合理性。因為如果咁都可以保證到，消委會整左成年那份200頁報告其實可以燒左佢。 J. - 不過話分兩頭，話人「XXX唔work」永遠都好易，問題係乜嘢先至work。 就消委會為加強規範裝修行業決定提出4大措施保障屋主，其實裝修佬一早都已經做緊呢四大建議， 去片：https://youtu.be/klSVIjKH6jM