吸塵機的牌子有很多，包括Bosch、Dyson和小米吸塵機等，究竟它們的功能有甚麼分別，哪一款比較適合自己呢？今日讓消委會及裝修學院為你分析買吸塵機時要注意甚麼吧！
每個大項入面都再細分幾個測試內容，有啲樣本例如Dyson V11 Absolute吸淨力高到有4.5分，有樣本喺 5 項項目中高低分差異好大，有啲就平均啲，但佢入面究竟測咗啲乜？細睇發現評價「使用方便程度」欄入面有項係說明書，文章用咗一大段篇幅去講述說明書嘅優劣比較。老實講，說明書如何易讀，都不是消費者關心的重點吧！
此外，評測中的20 個測試樣本配件非常多，但用家真正會用到嗎？購買初期你可能都會俾下心機換下吸頭吸塵，後期可能半年先用得一次縫隙吸頭去徹底清潔。多個掃頭吸頭不單實用度低，同時又浪費位置去儲存。又例如測試樣本入面好多款都配置床舖吸頭，但有不少消費者都話，寧願買個塵蟎吸塵機，都唔要用吸地板嘅吸塵機換個頭去吸啲床上用品。
至於續航力，當然重要，但又不是越長越好。測試入面提到樣本嘅續航力由7-38分鐘不等，但以一般香港單位的大小，吸十幾分鐘乜都吸晒啦，所以即使唔揀啲續航力太短嘅吸塵機，續航力太長亦冇乜用，用家揀返15 - 20分鐘嘅吸塵機就夠，並不一定是「5粒星最好」。
相信消費者買部過千蚊嘅吸塵機都想佢陪你三五七年，好多人買之前都會上網搜尋「XX牌吸塵機 壽命」，瀏覽啲唔知真定假嘅網上資料，以估估下嘅心態去買。今次消委會報告提咗呢 20 款吸塵機都有 1-3 年嘅保養期同寫明更換電池幾錢，但就冇測試部吸塵機耐唔耐用。如果消委會可以喺吸塵機嘅摩打或者鋰電池耐用度入手測試下，一定會成為大家購買時考慮因素之一。
此外，我哋訪問咗一個用直立式吸塵機幾年嘅真實用家，Chloe 3 年前買Bosch嘅一款2016出產嘅直立式吸塵機 （原價約$2,），用咗幾年佢感想係：買嘅時候冇為意，個部機重量成3.1KG，每日拎住佢吸塵都真係幾攰。另外Chloe最怕要洗佢個隔塵袋，要拆開四舊嘢先拆到個袋出黎洗，勁麻煩。Chloe最後表示下次買直立式吸塵機，除了吸淨力、價錢、寧靜度等有被評測的項目以外，重量和清潔方便程度也會列入考慮行列。
消委會測評入面，重量只係作為資料被記錄，冇加入評分考慮之中。但喺用家真係用到嘅時候就會明白重量嘅影響力，家電用得舒適係重要嘅考慮因素，所以大家唔好忽視呀！
今次消委會無線直立吸塵機測試報告確實有可取之處，主要係以功能出發，但係有啲位就冇乜考慮用家真實使用感受。如果增加重量、耐用度等等，更重要更貼身嘅測試，一定能夠提升測評嘅參考度。各位消費者係選擇直立式吸塵機嘅時候，除咗消委會測評，不妨考慮下本文提及嘅幾個重點，選取實用同真正方便自己使用嘅產品。
